Archives par mot-clé : jordy leygues

AS FRANCIMANDS par Auguste Quercy

LITTERATURE OCCITANE
CAMROSOS
Carsinolos

AS FRANCIMANDS
par AUGUSTE QUERCY
(1853-1899)
(Ed MOUNT-ALBA
Paul Massoun – Librari Editour – MCMXI)

A Moussu Jordi Leygues

Auguste Quercy As Francimands Artgitato

Moussu, n’ai qu’uno maire,
E quand, dins la lengo qu’endorm,
Lausi lou Carsi boultat d’or,
L’aunour del Grand Pais e l’aunour del Terraire
Pariu fan trefana ma pensado e moun cor.

Ma maire a dous parlas,
Douos lengos sorres, bessounetos.
Lou debenguèt mèstro, e l’autro, cacarlas,
Ambe’s roussinhoulets fargo de cansounetos.

E la maire a douos poupos ;
Mès l’astre-dius es mais audous,
Même lou lach pus aboundous,
Siès la sorre que canto, en fuselent d’estoupos,
Al mitan de prats berds, jous un cèl clar et dous.

O Pats ! gardo l’oustal.
Nostre bèl Mèjourn es tout amo ;
Un amour sant, frairal, lou cramo ;
Lauro supèrboment, e troubas dins soun tal,
Dubert à tout benent, de  gra, de flours, de ramo.

Cresès-ne nostros boucos,
Benès, grands artistes, ournal
Des Arts, de l’Esprit, del Journal,
Benès ! Faren raja lou chuc de nostros soucos,
E bous enraissaren de soulel mèjournal.

Oc, sèn pla del Mèjourn,
Terro de fe, de gauch, d’abounde,
Païs, malgrat Mounfort, indounde,
Afric de libertat ; mès, de nèch e de journ,
Ufrissen tout ço nostre à tout lou brabe mounde.

Noys-austris, sans caimados
E franc, trincarian, capdedis !
A l’ifèr o al paradis.
Per que festarias pas, am sas beutats aimados,
La Sorre del Mèjourn en bèl abroundadis ?

La Franco es un jardi
Poulit aimat de l’auselino,
Que coumo pod s’i abelino.
Despèi quouro, mardiu ! lou cap-rouge cardi
Es tengut de couaca Coumo la gourpalino ?

Nostre parla derengo !
El fach de gracios e d’amour,
Lempent dins l’amo de m’amour,
Rais celestial que met de mèl sus nostro lengo,
Per nous cassa del cor lou pèssoment, l’imour !

Dabans lous ennemics,
Qual t’a bist, raço mèjournalo,
Bira toun esquino à la balo ?
I a pas issam irous ni raujousos fourmics
Mai qu’elo afalcounats, quand la Franco s’amalo.

Ana dins lous traucasses
Ount maulhèroun lou bèrs gourmands ;
Cercas, demès lous Alemands
Mescladis as del Nord e del Païs des Casses :
A que recounestrès l’osso des Francimands ?

Laissas lou bièl garric
Flouri dins sa gigantario !
Sario loungo la litanio
De sous gaissous que bous an pourtat, ric-à-rac,
L’engin subre-mannat de nostro Occitanio.

Que d’estelos guerrièros
Trimfaloment planoun denaut !
Lour propro glorio es lour defaut.
Jansemin, Gambetta, Fermat, Ingres, Falguièros,
Sans gloup de sang, an mes lou noum francès tant naut !

L’anglès es recercat,
A l’alemand dièrboun las portos,
Rebiscoloun de lengos mortos ;
Mesprèsoun lou fruch d’or que rullo sul mercat,
E las bèlos flours d’Oc moroun dins nostros ortos !

O ma lengo adourado,
Noble parauli des arrès,
Quand dabans tu tout se barrès,
Se troubabos enloc abric ni retirado
Dins mon cor afougat auras toutjourn un brès.

Que lous cranto immourtals
Te decrètoun morto, iscarioto !
Soui e restarai patrioto ;
Mès parlarai patouès a mous darriers badals,
E la lengo del brès, soulo, oundrara ma cloto.