LITTERATURE OCCITANE
CAMROSOS
Carsinolos

LAS MOUNT-ALBANESOS
par AUGUSTE QUERCY
(1853-1899)
(Ed MOUNT-ALBA
Paul Massoun – Librari Editour – MCMXI)

O Mount-Alba ! dins nostre cor
Tenes la plaço la pus grando.
Cado mati, l’albo as pièls d’or
De lum e de gauch t’engarlando.
Tas filhos al tint brun o blound,
Candos coumo un liri de plano,
Ensoulelhoun milhou toun frount
Que lou pus fresc raioun d’arcano.

De soun cèl blu, plasent e pur,
Las estelos dauroun l’azur ;
Altour de tu, lous tucs berbejoun,
D’aigos claretos rajoulejoun ;
A las flouretos des houissous
Tous prats soun ples de pimparèlos
E tous bousquets de tourtourèlos.

Tas permenados, tous jardis,
Ount nisoun de bois de cardis ;
Toun platèu d’ount on bei l’Espanho ;
Tous boulbards, toun pount, ta campanho,
Toun Cours, que n’a pas de ribal,
Tous Musès, l’Oustal coumunal,
Ni tas casèrnos, ni tas glèios,
Ni tous tucs rouge de cirèios
Que dauro lou printemps noubèl,
N’es pas tout ço qu’as de pus bèl :
Tas filhos al tint brun o blound,
Candos coumo un liri de plano,
Ensoulelhoum milhou toun frount
Que lou pus fresc raioun d’arcano.

Un cèl d’amour lusis dins lours èlhous ;
La gracio ris sus lours rosos gautetos ;
Perfumarioun las pus noulentos flous ;
Lugrejarioun prèp de las esteletos ;
Lous angèlous catifoulets ;
Bouldrioun ta milo poutounets
Sus lours manetos tant poulidos,
E lous besiats parpalhoulets
Oublidarioun sus lours poutets
Las rosos las pus carmesidos.
Bèlos flouretos,
Tresor d’amour,
Brunos, bloundetos,
Fachos al tour,
Soun d’esteletos
Bostris èlhous ;
Bostros bouquetos,
Niucs de poutous.
Filhotos al tint brun o blound,
Candos coumo un liri de plano,
Sès pus poulidos que lou journ
E pus frescos qu’un rais d’arcano.